ഓരോരുത്തരുടേയും ആവശ്യത്തിനനുസരിച്ചാവണം സാമ്പാറിലെ പരിപ്പിന്റെയും കഷണങ്ങളുടേയും പൊടിയുടേയും പുളിയുടേയും ഒക്കെ കണക്ക്, അതുകൊണ്ട് കൃത്യം കണക്ക് പറയുക ബുദ്ധിമുട്ടാണ്.
പരിപ്പ്: നല്ല കട്ടി വേണ്ടവർ പരിപ്പ് കൂടുതൽ ചേർക്കണം അല്ലെങ്കിൽ വെള്ളം കുറവ് ചേർക്കണം. പരിപ്പ് വേവിക്കാൻ വച്ച് തിളയ്ക്കുമ്പോളുള്ള പത ഒരു സ്പൂൺ കൊണ്ട് കോരിക്കളയാം. കൂടെ ഒരു സ്പൂൺ എണ്ണയൊഴിക്കാം. ഇതുരണ്ടും പരിപ്പ് തൂവിപ്പോകാതിരിക്കുന്നതിനു പരിഹാരമാണ്. അല്പം ഉപ്പും മഞ്ഞൾപ്പൊടിയും ചേർത്ത് (കുക്കറിൽ) വേവിക്കുക. വേവാൻ ബുദ്ധിമുട്ടുള്ള കഷണങ്ങൾ പരിപ്പിനോടുകൂടെ ചേർക്കാം. ഉദാ: ഫ്രോസൺ ചേന, ഡയിലി ഡിലൈറ്റിന്റെ മുരിങ്ങക്കായ. പരിപ്പ് വേവിക്കുമ്പോൾ കൂടെ കുറച്ച് സബോള നുറുക്കിയതും ചെറിയ ഉള്ളിയും ചേർക്കുന്നത് നല്ലത്.
പച്ചക്കറികൾ: പച്ചക്കറികൾ പരിപ്പ് ഒരു വിധം വെന്തശേഷമാണ് ചേർക്കേണ്ടത് - ഞങ്ങൾക്ക് ഇഷ്ടമുള്ളവ: മുരിങ്ങക്കായ, വെള്ളരിക്ക, കുമ്പളങ്ങ, വെണ്ടക്ക, വഴുതനങ്ങ, കാരറ്റ്, ഉരുളക്കിഴങ്ങ്, തക്കാളി, കായ, മത്തങ്ങ, കൊത്തമരയ്ക്ക. പച്ചക്കറികൾ വേവനുസരിച്ച് കുറച്ച് വേർതിരിക്കാം. വെണ്ടയ്ക്ക അല്പം വഴറ്റി ഉപയോഗിക്കാം.
പച്ചക്കറികൾ വേവിക്കുമ്പോൾ ഒരു കഷണം കായം കൂടെ ഇടാം. കായത്തിന്റെ മണം ഇഷ്ടമുള്ളവർക്ക് സാമ്പാറ് ഉണ്ടാക്കിക്കഴിഞ്ഞ് ഒരു കഷണം കായം പിന്നേയും ചേർക്കാം; അല്ലെങ്കിൽ കടുകു വറക്കുമ്പോൾ അല്പം കായപ്പൊടി ഇട്ടാൽ മതി.
കഷണങ്ങൾ ഒരു മുക്കാൽ വേവാകുമ്പോൾ പുളി ചേർക്കുന്നു. ഉടഞ്ഞുപോകാതിരിക്കാനും കഷണങ്ങളിൽ പുളി പിടിക്കാനും ആണ് ഇങ്ങനെ. പുളിവെള്ളത്തോടുകൂടിയാണ് വഴറ്റിയ വെണ്ടയ്ക്കയും ഉരുളക്കിഴങ്ങ് നുറുക്കിയതും ചേർക്കുന്നത്.
സാമ്പാറുപൊടി: ഏതെങ്കിലും ബ്രാൻഡ് പരീക്ഷിച്ചുനോക്കിത്തന്നെ തിരഞ്ഞെടുക്കണം. ഈസ്റ്റേൺ, ഗ്രാൻഡ്മാ, ബ്രാഹ്മിൺസ്, നിറപറ എന്നിവ നല്ലതാണ്. വീട്ടിൽ പൊടിച്ചുണ്ടാക്കിയാലും നല്ലത്. സുമ ശിവദാസിന്റെ നാടൻ കറികളിലെ സാമ്പാർപൊടിയും ശ്രമിച്ചു നോക്കി ഇഷ്ടപ്പെട്ടിട്ടുള്ളതാണ്.
പൊടി ആവശ്യത്തിനു എടുത്ത് ലൈറ്റായി ചൂടാക്കി (ചൂടാക്കിയില്ലെങ്കിലും വലിയ പ്രശ്നമൊന്നുമില്ല) വെള്ളത്തിൽ കലക്കി ചേർക്കുക. കട്ടകെട്ടാതിരിക്കാനാണ് ഇത്.
കടുക്, ഉലുവ, ചുവന്നമുളക്, ഒരു ചെറിയകഷണം ചുവന്നുള്ളി അരിഞ്ഞതും കറിവേപ്പിലയും മൂപ്പിച്ച് ചേർക്കുക.
മല്ലിയില വേണ്ടവർക്കാകാം. അവസാനം ഒരു ചെറിയ കഷണം ശർക്കരയും ചേർത്താൽ നന്ന്.
